Halk-ı cihânın budur fikri hemân
Evliyâ hâlinden işit bir nişân

Evliyâ cümleye dolu hak bakar
Zîrâ Hakk gözünde bu kadar nazar

Evliyâda ol kadîm oldu nihân
Evliyâdan sor sorarsan sen nişân

Evliyâ bilir ol ebed milkini
Evliyâdan sor ırağı yakını

Sor ki hemân evliyâdır kılağuz
Evliyâ bilir nedir yahşı yavuz

Evliyâda cem’ olupdur kâinât
Doğru bak kim evliyâdır her sıfat

Evliyâdır cümle ‘âlem defteri
Evliyâ bitdi bu kânın gevheri

Evliyâdır kim ‘âlem tutdu karâr
Evliyâda cem’ olupdur ne ki vâr

Sırr-ı ezel ü ebeddir evliyâ
Hakîkat nûr-ı Ehad’dur evliyâ

Evliyâdır maksûdu her bendenin
Vechidir evliyâ cümle insânın

Evliyâ yüzünde Hakk’ı gör ‘ayân
Sıdk yolunda bu kadar ola nişân