Hudâvendâ beni fazlınla merdân zümresinden kıl
Seni ‘ârif olan ashâb-ı ‘irfân zümresinden kıl

İçir ‘aşk-ı hakîkî hamrını mest-i müdâm olam
Gice gündüz senin şevkinle mestân zümresinden kıl

Bu kesret fitnesinden lutf idüp ben kulunu kurtar
Koyup ağyârı sen şâh ile kalan zümresinden kıl

Hicâb olur imiş iki cihân ‘uşşâk gürûhuna
Beni cümle sivâdan fâriğ olan zümresinden kıl

İdüp Kuddûsî’yi hem zikre meşgûl sen celîsi ol
Anı ‘aşk bahrine sıdk ile dalan zümresinden kıl