Bu ‘aşka cân virendir hoş bahâdır
Ki dîdâr ol şehîde kan bahâdır

Kabîh ola muhibbe dirlik ansız
Bahâ dîdâr içün ölmek bahâdır

Bu yola cânlılardan kimse varmaz
Velî cansız gelenlere salâdır

Anı her yerde hâzır görmeyenler
Katı a’mâ vü yavlak bî-hayâdır

Bilin ‘âşıklara iki cihânda
Anın gayrına meyl itmek hatâdır

Bu yolda vü ol ilde evvel âhir
Bizim sermâyemiz sıdk u safâdır

Anın zehri bize tiryâk-ı ekber
Anın kahrı bize lutf u vefâdır

Anın zahmı bize merhem durur hem
Anın derdi bize ‘ayn-ı devâdır

Anın fazlından olmaz kimse mahrûm
Anın katında hâcetler revâdır

Bizim varlığımız oldur hemân pes
Ki zîrâ andan artuğu hebâdır

Anı sevmek durur ‘aşk-ı hakîkî
Kalanın sevgisi nefsî hevâdır

Nideriz biz bu dünyâ dostlarını
Ki gerü kendü bigi bî-vefâdır

Bize bir yâr u hem bir yer gerek kim
Ol ölmez hem fenâ bulmaz bekâdır

Eğer bîgâne isen andan iste
Şuları kim anınla âşinâdır

Zehî ‘âşık kişi kim cân u gönlü
Hemîşe işbu derde mübtelâdır

Koma ey ‘aşk eri bu ‘aşkı elden
Ki ‘âşıklar makâm-ı müntehâdır

Bu ‘aşkı tut delîl ol Dost eline
Ko şol hırsı ki rehzen-ejdehâdır

Kemâl Ümmî za’îfin sözlerinden
Murâdı kendüden sonra du’âdır

Bizi kim medh ü zemm iderse bizim
Ana kıldığımız medh ü senâdır

Zehî devletlü kutlu kârubân kim
Delîli Hakk yolunda Mustafâdır