Hidâyet it sırât-ı müstakîme
‘İnâyet eyle sultânım meded it
İre dil vasf-ı Rahmânu Rahîm’e
‘İnâyet eyle sultânım meded it

Tecellî-yi cemâlin kıl müyesser
Değil bir kerre ihsân it mükerrer
Ola nûrunla cân u dil münevver
‘İnâyet eyle sultânım meded it

Cenâb-ı zât-ı pâkin ‘izzetine
Habîbin Fahr-i ‘Âlem hürmetine
Bizi irgür visâlin ni’metine
‘İnâyet eyle sultânım meded it

Firâkın âteşine kılma sûzân
Visâlin zevkin ihsân eyle her ân
Kemâl-i cûduna yok hadd ü pâyân
Hidâyet eyle sultânım meded it

Bir avuç hâk iken eyledin insân
‘Atâ kıldın nice envâ’-ı ihsân
Yerin bulsun yine bu ‘ahd ü peymân
‘İnâyet eyle sultânım meded it

‘Arûs-i ma’nâ ref’ idüp hicâbın
Okusun cân u dil hüsnün kitâbın
Mufassal fehm ide her fasl u bâbın
‘İnâyet eyle sultânım meded it

Nazar eyleme her sehv ile kusûra
Mübeddel ola hüznümüz sürûra
İrişsin cism ile cânım huzûra
‘İnâyet eyle sultânım meded it

Bizi benlik oduna itme ihrâk
Cemâlin nûru vire câna işrâk
Kuyûd-ı mâsivâdan eyle ıtlâk
‘İnâyet eyle sultânım meded it

Güzer eyleye dil arz u semâyı
Göre her zerrede nûr-ı likâyı
İrişe şems-i zâtına Fenâyî
Hidâyet eyle sultânım meded it