Ârifin kalbi demâdem matla’-ı envâr olur
‘Akl u fikri rûh u sırrı kâşif-i esrâr olur

‘Ârifin gönlü içinde ‘arş u kürsî mâ-verâ
Zerre olmaz mahv olur hep cümle târ u mâr olur

‘Ârif olan zât-ı Hakk’ı kalb ile meşhûd iden
Anın içün rûz-ı şeb işi anın ezkâr olur

İbn-i Edhem gibi tâc u tahtının terkin urup
‘Ârif-i billah olanlar böylece hünkâr olur

Cân u dilden iştirâ âyâtın oku her nefes
‘Ârif-i billah ile kim dâim işi bâzâr olur

Her nefes mi’râc-ı rûhânî eyler dil ‘arşına
Bu sebebden ‘ârif-i billah olan bî-dâr olur

Cân u gönlü nefs u rûhu ‘akl u sırrı bir olup
Sırr-ı sırrıyla kamusu seb’a-i etvâr olur

Kâr u kesbi mâl ü mülkü cümle efkârı anın
Vâhidü Samed olan ol ulu Gaffâr olur

‘Âr-ı ‘ırzın nâm-ı nîkin terkin urur cümleten
Çeşm-i giryânı anın pes bahr ile enhâr olur

‘Ârife dünyâ vü uhrâ cümlesi oldu harâm
Ma’nevîyâ maksadı anın hemân dîdâr olur