Aşkdır min-evvel ilâ âhir kevn ü mekân
‘Aşkdır gâhi dil ü cânda nihân gâhi ‘ayân

‘Aşkdır iden cemâl-i pâk-i cânâne nazar
‘Aşkdır ol gonce gül-rûyi için bülbül olan

‘Aşkdır dü-‘âlem içre cânı yâre vasl iden
‘Aşkdır dâim olan hem mahrem-i esrâr-ı cân

‘Aşkdır çün dilde misbâh-ı tecellîyi yakan
‘Aşkdır bil “küntü kenz” birle miftâh-ı cinân

‘Aşkdır bî-kayd pervâz eyleyüp simurg-veş
‘Aşkdır dost ellerini dâimâ seyrân iden

‘Aşkdır mir’ât-ı kalbi eyleyen sâf ü celî
‘Aşkdır dilde veren nûr-ı ziyâyı her zamân

‘Aşkdır kalbi kılan pür-nûr mihr ü mâh-veş
‘Aşkdır şem’-i cemâle karşu pervâne yanan

‘Aşkdır hem saykal-ı mir’at-ı esbâb-ı derûn
‘Aşkdır bir âteş-i cân-sûz ey dil sen de yan

‘Aşkdır beyt-i dili meyhâne-i ‘irfân eden
‘Aşdtır Leylâları Mecnûn ü ser-gerdân iden

‘Aşkdır fehm ile iş’âr eyleyen derd-i dili
‘Aşkdır bak Âdile çarhı iden keşf ü beyân