Bir bâde ver sâkî bize
Mestâneler müştâk ola
Doldur mey-i bâkî bize
Zehr-i dile tiryâk ola

Büzr-i muhabbeti eke
Emtâr-ı hikmeti döke
Burc-i dilden şafak söke
Güneş gibi berrâk ola

Sâkî kerem eyle bize
Sırr-ı meyi söyle bize
Merhamet et böyle bize
Mâsivâmız ihrâk ola

Sâkî şerâb-ı eynemâ
Sende bulunur innemâ
İçen olur cihân-nümâ
Seyrângehi nüh tâk ola

Ey sâkî-i meyhânemiz
Doldur getir peymânemiz
Perde ata cânânemiz
Ebrûleri zer-tâk ola

Sâkî olur meyhânede
Mestâneler demhânede
Mey-i hayât peymânede
Gönülde iştiyâk ola

Gözler seni mestâneler
Açıla şerâbhâneler
Âkıl ola dîvâneler
Bay gedâ ber-siyâk ola

Mest makbûl-i dergâh olur
Hakîkate âgâh olur
Râhı da kıblegâh olur
Dil dîdesi ferrâk ola

Sâkî ise mîr-i zamân
Meyhânedir dâru’l-emân
Lutfî olur kâmil îmân
Pîşrevleri uşşâk ola