Bu pendi okuyub tutan olur hâs bende Yezdâna
Karışur ‘akıbet bir gün gürûh-ı ehl-i ‘irfana
****
Sevicek bir kulın Mevlâ virir birkaç güzel ahlâk
Günâhın mağfiret eyler ki koymaz anı nîrâna
****
Eğer sevmez ise bir kimseyi virir kötü ahlâk
Kabul itmez anın a’mâlini kor dâr-ı hizlâna
****
Tevazu’ it tezellül it tevekkül it terahhum it
Tezekkür it tefekkür it ta’abbüd eyle Rahmana
****
Mahabbet eyle ehl-i ‘ilm ü ‘irfan u salâha çün
Ki bunlar sevgilü bil Hazret-i Hallâk-ı ekvâna
****
Yetâmâya garibe hem fakire eylegil ikram
Kebîre eyle tevkîr merhamet it hem sagîrâna
****
Sebebsiz kimseyi incitme hîç it Müntakimden havf
Refîk ol rıfk u lutf eyle kamu insâna hayvana
****
Eğer i Mân iderse zenbini bir fâsık u fâcir
Hemân buğz it edeb bilmez haya bilmez o bîgâna
****
Dahi küffâr-ı bed-kâre münafık mülhide buğz it
Mukârin olma yok ise zaruret sû-yi akrana
****
Tecessüs eylemek câ’iz değil mü’minleriñ ‘aybın
Görürsen dahi setr eyle dime yârana düşmana
****
İki kişiye zinhar olma munis hem yakın olma
Bu dünyâ ehline dahi sakalsız taze oğlana
****
Çalış tevhîde gâfıl olma bir dem zikr-i Mevlâdan
Bu Kuddûsî ider nushı saña hem cümle yârana

Ahmed Kuddusi