Hayfâ ki bugün bir dil-i âgâh bulunmaz
Bin cân ile bir ‘âşık-ı Allâh bulunmaz

Mağrûr olup sûrete herkes oturakda
Hiç ma’nâda bir sâlik-i dergâh bulunmaz

Dârû-yı hakîme bulunur belki taleb-kâr
Derd-i dile ammâ ki devâ-hâh bulunmaz

Kaldı girih-i gamda gönül beste çü gonce
Bir bülbül-i pür-âh-ı seher-gâh bulunmaz

Tenhâ nice bir râh-ı muhabbetde tekâpû
Derdâ ki bu yolda bana hem-râh bulunmaz

Dervîş-i ‘abâ-pûş-ı şeh-i ‘âlem-i tecrîd
Bir meşreb-i dervîşde bir şâh bulunmaz

Peygûle-i mihnetde garîbâne çü Hakkı
Bir haste-i pür-zâr u bir evvâh bulunmaz