Elâ ey sâkî-i bezm-i muhabbet
Elâ ey feyz-pâş-ı câm-ı vahdet
Elâ ey mahrem-i râz-ı hakîkat
Elâ ey âşinâ-yı sırr-ı Hazret
Elâ ey gonca-i gülzâr-ı vuslat
Elâ ey bülbül-i bâğ-ı kerâmet
Çü sensin mazhar-ı âsâr-ı kudret
Çü sensin matla’-ı nûr-ı velâyet
Ezelden yârın olmuşdur sa’âdet
Açılmışdır sana bâb-ı hidâyet
‘İnâyet eylemişdir Hakk Te’âlâ
Anınçün cümleden a’lâsın a’lâ

Şerî’at ‘ilminin sen kâmilisin
Hakîkat mâyesinin vâsılısın
Bugün ‘âşıkların tutar elisin
Benim bir zerre şübhem yok velîsin
Hakâyık burcuna mihr-i celîsin
Seninle buldu zikrullah celîsin
Hakîkat mazhar-ı sırr-ı Alî’sin
Velâyet mezra’ının hâsılısın
Sa’âdet bâğının cânâ gülüsün
Siyâdet gülşeninin bülbülüsün
Revâdır nağme-sâz olsan keremden
Ki tâ cânım halâs ola elemden

Benem bir âşinâ-yı bahr-ı hicrân
Benem bir mübtelâ-yı ded-i ‘isyân
Benem bî-mâye-i bâzâr-ı ‘irfân
Benem bî-pâye-i meydân-ı ihsân
Benim hâlim değildir sana pinhân
Bana rahm it gözüm yaşın sil ey cân
Kapundur mesned-i eşrâf-ı insân
Tapundur cilvegâh-ı sırr-ı Sübhân
Benim gibi gedâya eyle dermân
Bana bir himmet et ey fazl-ı Yezdân
Bugün zîrâ mesîhâsın dem ile
Devâ kıl hastaya bir merhem ile

Kadîmî bendedir Hakkı-yı nâçâr
Demâdem himmet ü ihsânın umar
Olursan himmet ile sen ana yâr
Hayât-ı nev bulur ey nûru’l-envâr
Aradan ref’ olup sevdâ-yı ağyâr
Kala yâr ile ide gizli bâzâr
Bana virmez safâ bu bâğ-ı gülzâr
Beni kıl gülistân-ı Hakk’da sen zâr
Bu dünyâ kaydı oldu üstüme bâr
Bu dâr-ı mihnet oldu başıma dar
Geçir dünyâ vü ukbâ berzahından
Beni vâdî-i zâta irgür irken