Nefs-i nâ-fermân ile uğraşma yâr elden gider
Kelb-i ten-perver hevâsıyla şikâr elden gider

Meyl-i dünyâ-yı denîdendir mezellet hâsılı
İtmegil Kâf-ı kanâ’atden vakâr elden gider

Hâne-i dil olmasa manzûr olur elbet harâb
Kim görüpdür bî-hırâset bâğçe bâr elden gider

Tıflken kılgil ziyâret Ka’be-i ‘uşşâkı kim
İhtiyâr oldukda elbet ihtiyâr elden gider

Sıdk ile hizmet gerek meyhâneye kim bî-hulûs
Kâr-ger olmaz ecr-i bî-şümâr elden gider

Tevbeden geçmek hatâdır gerçi ammâ neyleyem
Gerdiş-i peymâneden kavl u karâr elden gider

Yârin ey Seyyid Nigârî terk-i sevdâ istemez
Terk-i sevdâ kılma kim manzûr-ı yâr elden gider

Seyyidü’l-ahkâmdır sulha gerekdir inkıyâd
Bir karış toprakdan ötrü bir diyâr elden gider