Ey sâkî aç meyhâneyi mestâneler elden gider
Hum-hâneyi âbâd kıl peymâneler elden gider

Meydir hayât-ı âşıkân ey sâkî-i cân rahm kıl
Meysiz kalırsa bâde-nûş meyhâneler elden gider

Mey kevser-i hayat-ı dil bak zevk-ı cennetden güzel
Sermest mey bulmaz ise emn ü emân elden gider

Mey fer verir derd ehline derddir devâ ey nûr-i dil
Derd ehli bulmazsa devâ tıb-hâneler elden gider

Bir cân nedir meyhânenin yolunda olmaya fedâ
Cânlar fedâ olmaz ise cânâneler elden gider

Meyhâneyi kapar isen hum-hâneyi yıkar isen
Mestâneler harbe çıkar büt-hâneler elden gider

Seyret gönül illerini geç mâsiva çöllerini
Kesbet gönül hallerini dil-hâneler elden gider

Cismin hayâtı rûh ise rûhun hayâtı bâdedir
Mey zevkı dilde olmasa rûhâneler elden gider

Ey sâkî-i devr-i zemân meyhânedir dârü’l-emân
LUTFÎ diler bir mey hemân dem-hâneler elden gider