Ey Hudâ cân hazretinden lutf ile ihsân diler
Düşmüş ‘ısyân denizine ‘afv ile gufrân diler

Zerre denlü rahmetinle cümle ‘âlem gark olur
Ey niçe miskîn kulun var derdine dermân diler

Gün gibi günden ‘ayân rûşen kılarsın ‘âlemi
Pertev-i nûr-ı cemâlin bir kezin handân diler

Kıl ‘inâyet fazlın ile kalmasın bî-çâreler
Yalvarup hüsnün bâğında hüsnüne seyrân diler

Fâsıkîne ta’n içün değil bizim niyâzımız
Çünki anlar hazretinden zecr ile zindân diler

Dalmağa ‘ummân-ı ‘aşka baş urup merdâneler
İster anlar kim getire dürr ile mercân diler

Şol münâfıklar Hakk’ı zikr eyleyenlerden kaçar
İstemezler Hakk’dan illâ zift ile katrân diler

Kimseler Hakk dergâhından kahr ile dûr olmasın
Anın içün her nefes kalbinden ol hızlân diler

Dost yolunda cânı kurbân eyleyen merdâneler
Top edüp baş atmak içün göz urup meydân diler

‘Âra kalmaz kâra kalmaz ‘âşık-ı mestâneler
Cümlesinden el çeküben zâr u sergerdân diler

Ey Sinân Ümmî yürü ehl-i belâ hizbinden ol
Zîrâ anlar Yâr elinden derdine dermân diler

Ümmi Sinan