Ey kemâl-i kudretin ‘âlemde izhâr eyleyen
Ve’y cemâl-i zâtına ‘âlemleri zâr eyleyen

“Semme vechullah” sırrın keşf idüp ‘âşıklara
Düşmeni dost eyleyüp ağyârı hep yâr eyleyen

On sekiz bin ‘âlemin esrârını cem’ eyleyüp
Yükleyüp bâr-ı emânet âdemi vâr eyleyen

Zerre-i feyz-i lutfun ile hârdan güller biter
Ey nesîm-i rahmetinle nâr-ı gülzâr eyleyen

Hüsnüne mazhar kılup kâmillerin mir`âtını
Dembedem ‘âşıklarına arz-ı dîdâr eyleyen

Zulmet-i ‘unsurdan eyle Hakkı’yı tahlîs sen
Ey cemâli nûruna kalbi sezâ-vâr eyleyen