Ey sana ikbâl-i rûz efzun atâ-yi Kirdigâr
Muttasıl ta’zîmine me’mur devr-i rüzgâr
Âftâb-ı âs-mân-i adlsin olmaz aceb
Kılsa ikbâlin tekâzâ-yi ulüvv-i iktidar
Kurb-i der-gâh-i hilâfet şevki câzibdir sana
Eyler isen n’ola tağyir-i mekân bî-ihtiyâr
Adl bir makbûl tâ’attir ki kalmaz ecrsiz
Âdilin elbette kadrin arttırır Perverdigâr
Gerçi tahrîkin senin hikmet tekâzâsiyledir
Handa azm etsen olur senden münevver ol diyâr
Pertev-i ikbâl ile şem’-i cihân-efruzsun
Zevk-i dîdârındadır hâsiyet-i bâd-i bahâr
Hansı hâr-i huşke lûtfun yetse eyler bâr-ver
Hansı sahrâya güzâr etsen kılarsın lâle-zâr
Ebr-i nisansın değil bî-hûde tahrikin senin
Her gün eyler kesb senden bahr dürr-i şâh-vâr
Handa olsan olduğun kişverde olmaz inkılâb
Hansı gam ehline kim yetsen olursun gam-güsâr
Lîk senden ayrılan halkın işi düşvârdır
Bir şeb-istânın çerağın alsalar olmaz mı târ
Tîre olmazmı cihân pinhân olacak âf-tâb
Gidicek gül devri bağın gül-bünü olmaz mı hâr
Haste kesmez mi hâyatından tama gitse tabîb
Gitse cân olmaz mı cism-i derd-perver hâk-sâr
Ey felek bi’llah nedir mucib ki bu mülk ehline
Cevri bî-had ettin ü bî-dâdı kıldın bî-şümâr
Nice kıldın âfiyet mülkün vîrân zulm ile
Nice saldın zevk mir’atına mihnetten gubâr
Sen bilirsin kim bu mülk ehline olmuştur şefîk
Hazret-i Pâşâ-yi sâhib-rif’at ü gerdûn-vekâr
Ol salıptır bunda âsâr-i kerem âvâzesin
Ol kılıptır bunda cem’iyyet esâsın üstüvâr
Nişe aldın başımızdan sâye-i ikbâlini
Nişe ettin ehl-i idrâke bu zulmü âşkâr
Etmedin mi vehm andan kim kılam bir âh ile
Heft tâk ü nüh revâkın raht ü bahtın târ-mâr
Özr ile gerdûn dönüp verdi cevâbın k’ey fakîr
Bî-tekellüf olmuşum ben hem bu işden şerm-sâr
Lîk ma’lum eyle kim bu mâ-cerâ benden degil
Sen kılardın iltimâsın bu işin leyl ü nehâr
Eyleyip acz ü niyâz ile du’âyi bî-riyâ
Ol ser-efrâza sen isterdin ulüvv-i i’tibâr
Lâ-cerem olmaz tezâ’uf mesnedi tağyîrsiz
Yetmeyince menzile bulmaz taleb ehli karâr
Nice kılsın arzû-yi ihtilâtın ehl-i kurb
Nice çeksin ehl-i rif’at makdemine intizar
N’ola ger hur-şîd veş devr etse ol sâhib-nazar
Ger ıraktır ger yakın ihsânına ümmîd-vâr
Handa olsa görmesin tâb-i havâdisten zarar
Zât-i pâkin saklasın her fitneden Perverdigâr
Ey ki hicrânın dil-i efgâra salmış iztırab
Firkatın te’sîri etmiş cânı mahzûn cismi zâr
İsterim dâ’im görem dîdarın ammâ n’eyleyim
İhtiyarım yok benim re’yimce çerh etmez medâr
Var ümîdim handa olsan devlet ü ikbâl ile
Ola bahtın kâm-yâb ü kâm-rân ü kâm-kâr
Ola vasıl handa olsan devlet ü ikbâline
Her du’a kim sıdk ile eyler Fuzûlî hâk-sâr

Fuzuli