Ey serîr-i nâz u ni’met içre olanlar nişîn
Olmanız zehr-i ecel nûş itmeden bir dem emîn

Gûşuna al da’vet-i kabri ne dir gûş eylegil
Âhir olursun fenâ erbâbına ey dil karîn

Sarsar-ı bâd-ı ecel bir gün hazân eyler seni
Var hazân olmazdan evvel olagör dâim hazîn

Nâme-i a’mâli pür kılma hatâ ile sakın
Sanma kim okunmaya dîvân-ı Hakk’da yevmü’d-dîn

Menzil-i maksûda irmez kimse cidd ü sa’y ile
Tâ meğer ide hidâyet ana Rabbü’l-‘âlemîn

Çün sefer eylersin âhir Hakkıyâ âmâde ol
Nice bir bu nâz-ı nâ-hemvâr-ı hayl-i gâfilîn