İçmişem câm-ı Elest’i olmuşam mestâne ben
Gelmişem germiyyet ile âlem-i imkâne ben

Pertev-i mihr-i cemâl-i dost düşdi gönlüme
Olmuşam pervâne şem’-i hüsne yane yane ben

Çün ezelden düşdi sevdâ-yı mahabbet başıma
Bağlanub zencîr-i aşka olmuşam dîvâne ben

Bu dil-i şûrîdeyi âsûdelik rüsvây ider
Derdden haz almışam meyl itmezem dermâne ben

Sözlerim yâ Rab hatâ itdiklerim cümle günâh
Mazhar olursam zehî lûtf u kerem ihsâne ben

Afv idersen mahz-ı fazlındır Azîzî bendeni
Pâdişâhâ ben dimem ki lâyıkım gufrâne ben