Kalbe na’ti o habîbin virir elbette neşât
Kaldırır kabzı derûndan getirir bast-ı bisât

Şânına lâyık olan vasf ile olmaz icrâ
İ’tibâr-ı zer-i hâlisde olur çün kırât

Vasfının haddi mi var ki ola ta’rîf ü beyân
Gâyeti olmayan evsâfa olur mu ifrât

Ger mürekkeb ola yem her şecer olsa aklâm
Vasfını yazmağa her bir melek olsa hattât

İrmeye haddine tâ haşre dek olsa tahrîr
Nâ-sezâ kavli nu’ûtunda gerekdir iskât

Vasfınıñ her ne kadar gâyet ü haddi yok ise
Yine oldukça senâsında gerekdir ıksât

‘Acz-i eş’âr ile vasfında gerekdir iş’âr
De’b-i medhinde Salâhî budur âdâb-ı sırât