Kerem kıl kesme sultânım keremin bî-nevâlardan
Kerem-kâne yakışır mı kerem kesmek gedâlardan

Esîr-i dâm-ı firkatdir gönül derbend-i hayretde
Alır dil bûy-i zülfünden seherlerde sabâlardan

Der-i dergâhına karşu nice üftâdelerin var
Ser-i kûyinde kurbânın muhabbet-âşinâlardan

Terahhum eyle dildârım bırakma dâr-ı hasretde
Kesilmez hastegânın gözleri dâr-ı devâlardan

Bu kânûn-i kadîmîdir ezelden tâ ebed cânâ
Ki va’deye vefâdârlık umarlar zü’l-vefâlardan

Düşüp yüz üstüne sızlar göre dîdâr-ı cânânı
Erişe merhamet elbet sizin devlet-serâlardan

Civâr-ı yâre kurbiyyet bulursa âşık-ı sermest
Umanlar vuslatı Lutfî çekinir mi cefâlardan