Zât-ı Hakk’da mahrem-i ‘irfan olan anlar bizi
‘İlm-i sırda bahr-i bî-pâyân olan anlar bizi

Bu fenâ gülzârına bülbül olanlar anlamaz
Vech-i Bâkî hüsnüne hayrân olan anlar bizi

Dünyâ vü ukbâyı ta’mîr eylemekden geçmişiz
Her tarafdan yıkılup ‘uryân olan anlar bizi

Biz şol abdalız bırakdık eğnimizden şâlımız
Varlığından soyunup ‘uryân olan anlar bizi

Kahr u lutfu şey’-i vâhid bilmeyen çekdi ‘azâb
‘Azâbdan kurtulup sultân olan anlar bizi

Zâhidâ ayık dururken anlamazsın sen bizi
Cur’a-i sâfî içüp mestân olan anlar bizi

‘Ârifin her bir sözünü duymağa insan gerek
Bu cihânda sanma ki hayvân olan anlar bizi

Ey Niyâzî katremiz deryâya saldık biz bugün
Katre nice anlasın ‘ummân olan anlar bizi