Rabbini bilmek dilersen sen eğer ‘ayne’l-yakîn
Nefsini bil kim nedir aslın düşün Hak hikmetin
****
Çün peder sulbında bir katre su idin bilmiş ol
Ana rahmine akuban anda turdın nice hîn
****
Anda kırk gün meks idüben kana oldın munkalib
Gör nice halk ider imiş kulı Rabbü’l-‘âlemîn
****
Pes turub kırk gün dahi oldın hemân bir mud’a et
Sonra endâmın seçildi cümlesi hem yir yirin
****
Sureti düzen melek düzdi kamu a’zânı hem
Virdi cân Hallâk-ı ‘âlem buldın inşân hey’etin
****
Eyledi anda gıda kanı saña Rezzâk-ı halk
Tokuz ay olınca buldun bu cihanın ‘izzetin
****
Virdi tedrîc-ile kuvvet dürlü ni’met hem saña
Kudretiyle eyledi bu cismini hısn-ı metîn
****
İç ü taşında olan esrar ü âyâtı kamu
‘Aklını başına dir eyle tefekkür cümlesin
****
Cümle a’zânı düşün sıdk-ıla başdan ayağa
Bil Hudânın sendeki olan kemâl-i kudretin
****
Pes tokuz cevherden olmışdur mürekkeb bu beden
Dördi atanın menisinden olur hâsıl hemîn
****
Biri ol dördin kemik biri sinir biri tamar
Birisi dahi deridür kıl te’emmül ey emîn
****
Hem beşi ana menisinden et ile kan ilik
Kıl ile yâg bu tokuzdur bil beden cevherlerin
****
Çift olan a’zâ berâberdür biri birine heb
Kudret-i Hallâka bunlar dahi bürhân-ı mübîn
****
Baş topak gözün yiri çukur-durur burun yüce
Burma burmadur kulaklar bunların bil sırların
****
Zühd-ile kimse talamaz ma’rifet deryasına
‘Işk-ıla talınur ancak çünki ka’rı pek derin
****
Sen de Kuddûsî tefekkür bahrine tal ‘ışk-ıla
Çün aña her kim talarsa ol bulısar dürlerin

Ahmed Kuddusi