Sa’âdet râhına şol kim sülük idüb sa’îd olsa
İrişür menzile elbetde muhlis müstefîd olsa
****
Hudâ Kur’ân içinde zikr idin deyü buyurdı pes
Murâdını bulur zâkir eğer sâdık mürîd olsa
****
Buyurdı cedd-i dû îmâna kim ol fahr-i mevcûdât
Nolur tevhîdi çok itsen ki îmânın cedîd olsa
****
Bu ‘ilm ü zühd ü tâ’atler düşürmüşler seni ‘ucba
Nefi’ virmez sana bunlar ne denlü de mezîd olsa
****
Tefekkür eyle Bel’âmın ki noldı ‘âkıbet hâli
Gider mi idi küfr-ile hemân ‘ilmi yufîd olsa
****
Salât u hacc u savm-ıla ledün ‘ilmi bilinmezmiş
Bu dersi anlamaz monlâ cihânda hem ferîd olsa
****
Muhakkak bil ki zikrullah kılar âdemleri ‘ârif ‘
Aceb midir ki ‘âşık zikr-ile bahr-i sefîd olsa
****
İnanmazsan sözime tecribe eyle otur kırk gün
Gelür ‘ışk u mahabbet gönlüne taş u hadîd olsa
****
Riyâ itmez idi zâhid şarâb-ı ‘ışkı nûş itse
Olurdı ma’rifet kânı ne mikdâr-ı pelîd olsa
****
Ne güzel rûz u şeb tevhîde meşgûl olsa bir ‘âşık
Ki Kadir olsa gicesi dahi gündüzi ‘îd olsa
****
Yiyüb içüb uyumazdı behâ’im gibi şol gâfıl
Özünde zerre denlü ‘ışkı yâ havfı va’îd olsa
****
İrer rütbe-i ‘ulyâya ki Kuddûsî o kul kim tâ
Ki seyf-i ‘ışk-ıla kati olunub ol-dem şehîd olsa

Ahmed Kuddusi