Sana bir ma’cûn-ı nâfi’ öğredeyim sâlikâ
Anı her kim yir ise görmeyiser renc ü ‘anâ
****
Gerçi her derde devâ virmiş Hudâ lâkin begim
Yok-durur anın gibi dünyâda kuvvetli devâ
****
Bir kişi ‘ömründe bir kerre yise bulur necât
Sâlim olur her belâdan hîç ‘azâb olmaz ana
****
Gice gündüz turmayub her dem diyen ‘âşıklara
Bil hayât-ı sermediyye bahş ider Bârî Hudâ
****
Hem ider rûhı telezzüz anı iksâr idenin
Gönüne deryâ gibi ‘ışk toluben bulur safâ
****
Ol olur Hakk’ın enîsi Hak olur ana celîs
‘Akıbet eyler o ma’cûn anı Hakka âşinâ
****
Bil ki ma’cûn didiğim tevhîd-i Yezdândır benim
Semm ile tiryâkdan olmuşdur mürekkeb dinle hâ
****
Semm-i nefy’ isbât dahi hem sâlike tiryâkdır
Sâlike ma’cûn-ı müshildir virir kalbe cilâ
****
Anı bir kez dise kâfir mü’min olur şübhesiz
Rûz u şeb meşgul olan ana velî olmaz mı yâ
****
Anı iksâr eyle Kuddûsî gice gündüz hemân
Olmasun ‘ömr-i ‘azîzin hâb-ı gafletle hebâ

Ahmed Kuddusi