Bulmak istersen hayât-ı câvidân
Yan yakıl pervâne ol Hakk yoluna
Virmesin dirsen keder kevn u mekân
Yan yakıl pervâne ol Hakk yoluna

Sana darlıkdır olan haml-i sakîl
Terk it anı itme kendini zelîl
Zâhir olsun dir isen sırr-ı Halîl
Yan yakıl pervâne ol Hakk yoluna

Bu vücûda eyler isen ger gurûr
Kurb-i Hakk’dan olısarsın bil ki dûr
Hullet-i Hakk ide bir gün nârı nûr
Yan yakıl pervâne ol Hakk yoluna

Nûr-ı Hakk’la dolunuben taşagör
Hemçü deryâ kaynayuben coşagör
Sa’y idüben nâr-ı ‘aşka düşegör
Yan yakıl pervâne ol Hakk yoluna

Göz açup bakma cihânın bâğına
Salma şeh-bâz-ı dili merz âğına
Giregör bir kâmilin ocağına
Yan yakıl pervâne ol Hakk yoluna

Evliyâlar imtihân ider eri
Sâdık isen Hakk yoluna vir seri
Pendini pervâneden algıl yürü
Yan yakıl pervâne ol Hakk yoluna

Pûte-i ‘aşkda idegör nefsi kal
Kâline bakma olagör ehl-i hâl
Derdini Bîçâre’den eyle suâl
Yan yakıl pervâne ol Hakk yoluna