Zâr u giryân olan ehl-i îmâne
Dest-gîr olacak bir ferd mi kaldı
Derd elinden dâde gelmiş emâne
Bir hakîm-i hâzık üstâd mı kaldı
****
Uryân giryân yetîm etfâl-i müslim
Fakîrler çekerler azâb-ı elîm
Rahm edecek var mı bir kalb-i selîm
Derûn-i merhamet mûtâd mı kaldı
****
Nice cânlar açlarından öldüler
Niceler feryâde dâde geldiler
Ganîler nefsine meşgûl oldular
Allah içün kula imdâd mı kaldı
****
Arayanlar cândan emr-i Hudâ’yı
Yâd ederler elbet rûz-i cezâyı
Kesbedenler dilde nûr-i hüdâyı
Mezar taşlarında bir âd mı kaldı
****
Yine iyiler vardır yüzlerde birler
Ekserî simsiyâh civânlar pîrler
Kavl-i mücerredde İslâmız derler
Hakk’a ibâdetde dilşâd mı kaldı
****
Ilgıt ılgıt akar kanlar cânlardan
Ayrıldı gitdiler nâm u şânlardan
Belâ nüzûl eder âsumânlardan
Recâya yüz dutmuş ibâd mı kaldı
****
Lutfiya var ise sende hidâyet
Kalbinde var ise nûr-i dirâyet
Bu seâdet zevâl buldu nihâyet
Yerlere düşmemiş şimşâd mı kald

Alvarlı Efe Muhammed Lütfi Hazretleri