Zikr ü tevhîd ile gel kalbini mesrûr eyle
Kalmasın dilde keder zulmetini dûr eyle

Her tarafdan çün üşer başına pervâne-i gam
Sen dahi şem’-sıfat her nefesin nûr eyle

Bezm-i gamda kulağın dest-i zamâne burıcak
Nâleler eylemeğe gönlünü tanbûr eyle

Giceyi güne değiş hattına didi niçe kez
‘Ârızın remz ile dir ‘anberi kâfûr eyle

Vaslını istediğim ger ola yanında günâh
Dil-i dîvâneme bakma beni ma’zûr eyle

‘Aşk yayı katıdır kimesne çekmez didiler
İmtihân eyle dilâ sen de gelüp zûr eyle

Göklere irse başın gelmeye gönlüne gurûr
Yüzünü yire sürüp kendözünü mûr eyle

An günâhını akıt gözyaşını subha değin
Benzesin bahra Muhibbî yaşını şûr eyle