Ey sârbân men nâtüvân
Çek semt-i dildâra beni
Cân hasta tendir hâkdân
Çek semt-i dildâra beni

Başdan ayağa derdden
Bin pâre oldu bu beden
Tak gel tabîbâ bir resen
Çek semt-i dildâra beni

Cân murgu çün pervâne-vâr
Şem‘-i ruhu devvâre yâr
Cürmüme kılma i‘tibâr
Çek semt-i dildâra beni

Sa‘yimle bitmez bu dilek
Çeksem de rûz u şeb emek
Lutf eyleyip de ey melek
Çek semt-i dildâra beni

Her bir demim fasl-ı bahâr
Olsa olur leyl ü nehâr
Dil la‘line cân sana yâr
Çek semt-i dildâra beni

Hulûsî tâb-âver dilin
Âşüftesidir ol gülün
Bend eyle zülfe kâkülün
Çek semti dildâra beni