Es-salâ gelsün gelen meydân-ı aşka es-salâ
Baş u câna bakmayan merdân-ı aşka es-salâ

İbn-i Edhem gibi tâc u tahtını terk eyleyüp
Kul olan gelsün beri sultân-ı aşka es-salâ

Âşık-ı sâdıkların bezmine da’vet eylemiş
Bâb açık yol togrıdur eyvân-ı aşka es-salâ

‘Aklı aşkın kaydına bend eyleyenler kandadur
Gelsün ol dîvâneler dîvân-ı aşka es-salâ

Tâli’ oldı burç-ı nârîde bugün şems-i cemâl
Cism eridüp cân yakan sûzân-ı aşka es-salâ

Bahr-i aşkın çünki her bir katresi deryâ olur
Hazmına kâdir olan yârân-ı aşka es-salâ

Ka’be-i vasla irüp NURİ yolında sa’y ile
Cânı ihzâr eyledi kurbân-ı aşka es-salâ