Görüñ ‘aşkı nice hayrân eyledi
Görüñ ‘aşkı nice ‘uryân eyledi

Mahabbet âteşi yanar yürekde
Görüñ ‘aşkı nice biryân eyledi

Atar münkir olan taşı cânıma
Görüñ ‘aşkı nice nişân eyledi

Zâhide virmedi zâkiriñ zevkın
Görüñ ‘aşkı nice devrân eyledi

Bulınca göñülde genc-i nihânı
Görüñ ‘aşkı nice vîrân eyledi

Bir zerrede on sekiz biñ ‘âlemi
Görüñ ‘aşkı nice seyrân eyledi

Cân gezer katrede yedi deryâyı
Görüñ ‘aşkı nice ‘ummân eyledi

Hakkıñ tevhîdiniñ zâtın sıfâtın
Görüñ ‘aşkı nice ‘ayân eyledi

‘Ârifiñ nutkını hakka’l-yakîndan
Görüñ ‘aşkı nice ‘irfân eyledi

Zâhidiñ korkusı tamu yirini
Görüñ ‘aşkı nice bûstân eyledi

Cemâli bâgından âb-ı revânı
Görüñ ‘aşkı nice reyhân eyledi

İçelden cür‘asın bezm-i elestiñ
Görüñ ‘aşkı nice mestân eyledi

Olupdur vücûdum meye kâr-hâne
Görüñ ‘aşkı nice dükkân eyledi

Yedi iklîm dört köşeniñ hânıyam
Görüñ ‘aşkı nice sultân eyledi

Bu nefsiñ yedügi inkâr aşını
Görüñ ‘aşkı nice îmân eyledi

Bu ‘aklı bu nefsi cânı emrine
Görüñ ‘aşkı nice fermân eyledi

Unutdı igvâsın hannâs u şeytân
Görüñ ‘aşkı nice insân eyledi

Bu derdiñ çâresi bulunmaz dirler
Görüñ ‘aşkı nice dermân eyledi

Ledünnî ‘ilmini bildürmek içün
Görüñ ‘aşkı nice erkân eyledi

Bilmez Ümmî Sinân agı karayı
Görüñ ‘aşkı nice fettân eyledi