Geldi ol İsi kim andandır hayat-i ehl-i hâl
Yoktur ansız halk cisminde hayâta ihtimâl
Geldi ol Hızr-i mübârek-pey kim ansız bî-delil
Muztarip kalmıştı ehl-i fazl ü erbâb-i kemâl
Geldi ol Mehdî ki salmıştı zamân-i gaybeti
Muztarip kalmıştı ehl-i fazl ü erbâb-i kemâl
Geldi ol Âsâf ki kondurmuştu cünd-i şevketi
Dâmen-i mülk-i Süleymân’a gubâr-i ihtilâl
Ser-firâz ü nik-‘ahd ü nik-re’y ü nek-hû
Ser-ver-i pâkize-etvâr ü pesendîde-hisâl
Cevher-i kâbil Ayâs-i âkıbet-Mahmûd kim
Halka göstermiş anı Îzid felekden bir misâl
Merhabâ ey revnâk-efzâ-yi serîr-i izz ü câh
Merhabâ ey zîb-bahş-i mesned-i câh ü celâl
Ser-verâ hakkı ki hur-şîd-i cemâlinden cüdâ
Ahter-i ikbâline yetmişti Bağdâd’ın zevâl
Olmuş iken eşk seyl-âbiyle a’mâ şükr kim
Buldu çeşm-i mülk hâk-i makdeminden iktihâl
Kalmamıştı feyz gûyâ kim sana imdâd için
Evliyâ kılmıştı Burc-i Evliyâ’dan irtihâl
Ey hoş ol kim hırmen-i a’dâyı ber-bâd etmege
Cânib-i deryâya kıldın seyr mânend-i şimâl
Hasm mülküne hırâmân eyledin hadrâ alem
Şerr-i şeytan def’ine açtın melek veş perr ü bâl
Girdin ol iklîme kim bahr ile berrinde anun
Yok sana bir mûnis ü gam-hâr gayri Zü’l-Celâl
Kılmadın emvâc-i deryâ-yi adâvetden hazer
Çekmedin ahvâl-i âsâr-i havâdisden melâl
Kestin evvel fitne başın intizâm-i mülk için
İbtidâ-yi kâr-i hayr ettin mübârek oldu fâl
Feth kıldın ol yeri kim devr-i Âdem’den beri
Kılmamıştı sâhibinden gayre hergîz intikâl
Aldın ol iklîmi kim âlemde yüz bin pâd-şâh
Hasretiylen verdi can fethin bilip emr-i mûhâl
Açtın ol mülkü ki yüz bin saltanat lâfın uran
Oldu acz ile anun da’vâ-yi teshîrinde lâl
Şâhed-i Basra perişan-hâl iken verdin ana
Hatt ü hâl-i leşker-i İslâm’dan zîb ü cemâl
Minberin zikr-i hümâyûn ile etten ser-bülend
K’ol makâmı hayftır kılmış erâzil pây-mâl
Sikkesine pâd-şâh ismiyle verdin zib ü fer
Hayf idi kim râm ola ağyâre ol ra’nâ gazâl
Kestin ol iklîmden ehl-i Fireng’in rağbetin
Açabilmez oldu küffâr ol yana çeşm-i hayâl
Halka i’lâm etmege din-i Muhammed tâ’atin
Eyledin ol Mescid-i Aksâ’ya ta’yîn-i Bilâl
Ser-had-i Hindû-sitan açtın sana yüz âferin
Rûm ruhsârına hayli zînet artırdı bu hâl
Ger sana düşmen mukâbil durmadıysa vechi var
Ol durur huffâş sensin âf-tâb-i bi-zevâl
Feth yüz tutmuş sana her handa kim azm eylesen
Hiç kesden sûretâ gelmez hilâf-i imtisâl
Leşkerin azm etse bir sâ’atte eyler târ-mâr
Her ne tedbir ü te’emmül kılsa hasmın mâh ü sâl
Seyr kılsan himmetin sarfına döymez bir nazar
Kılsa a’dâ cümle ömrün sarf-i zabt-i mülk ü mâl
Arsa-i ceng ü cidâlin katlden hâli değil
Muttasıl re’yinle tîgindır kılan ceng ü cidâl
Tîgin ister rezm ede başlar kese kanlar döke
Re’yin etmez düşmenin fethini muhtâc-i kıtâl
Böyle kim tevfik-i Hak nusret nasib etmiş sana
İktisâb-i rif’at ü ikbâle düşmüştür mecâl
Tut cihan ma’müresin ser’asker-i İslâm olup
Nev-cevanlar zûr-i bâzûsuna döymez pîr Zâl
Cevher-i zâtında çün tedbîr-i nazm-i mülk var
Lûtfu şâh-en-şâh-i İslâm’ın sana olsun helâl
Oldu rûşen kim sana âğâz-i rif’attır bu feth
Pertev-i hur-şîdden bedr olacaktır bu hilâl
Var ümîdim kim muhâlifler arasında müdâm
Âs-man kıldıkça nirân-i adâvet işti’âl
Muttasıl feth ola rûzi cânib-i Hak’dan sana
Feyz-i medhinle Fuzûlî hasteye hüsn-i mekâl

Fuzuli