Meydân-ı tevhîdde merd-i merdâne
Şem‘a-i îmâne oldum pervâne
Mâlik oldu gönül nûr-ı ‘irfâne
İkrâr u tasdîkım elde dürdâne
Giderim cennete iki bir yokdur
Hüsn-i zannım Hâlık’ıma pek çokdur

Sebkat etdi se’âdet-i ezelî
Tevhîd etdim ezel ben Lem-yezel’i
Kâdir Allah kâinatı düzeli
Mahbûbumdur güzellerin güzeli
Giderim cennete iki bir yokdur
Hüsn-i zannım Hâlık’ıma pek çokdur

Nûr-i basîretle gördüm cihânı
Seyreyledim âşikâre nihânı
Tevfîk-i Hakk dilde tevhîd burhânı
Açıldı ebvâb-ı feyz-i rabbânî
Giderim cennete iki bir yokdur
Hüsn-i zannım Hâlık’ıma pek çokdur

Aklı olan bilir hatâ sevâbı
Güneş-veş meydânda Hakk’ın kitâbı
Emrullahı tutan görmez ‘itâbı
‘İrfân tarîkıyle aldım hitâbı
Giderim cennete iki bir yokdur
Hüsn-i zannım Hâlık’ıma pek çokdur

Kabûl etdim cândan emr-i Kur ’ân’ı
İnkıyâd eyledim tutdum fermânı
Namaz kıldım aldım bûy-i rahmânî
Secdede seyretdim zevk-ı îmânı
Giderim cennete iki bir yokdur
Hüsn-i zannım Hâlık’ıma pek çokdur

Allah’ın bizlere büyük ikrâmı
Müyesser eyledi dîn-i islâmı
Bu islâmdır se’âdetin i’lâmı
İslâmların selâmetdir encâmı
Giderim cennete iki bir yokdur
Hüsn-i zannım Hâlık’ıma pek çokdur

Salât ise Hakk’ı büyük bilmekdir
Zekât ise Allah içün olmakdır
Oruç ise hubb-i Mevlâ bulmakdır
Îmân ise Kur`ân ile kalmakdır
Giderim cennete iki bir yokdur
Hüsn-i zannım Hâlık’ıma pek çokdur

Hacc ise bir ziyâfet-i Hudâ’dır
Ziyâret-i Ka’be emri edâdır
İslâm olan emrullaha fedâdır
Kalb-i mü’min kenz-i nûr-ı hüdâdır
Giderim cennete iki bir yokdur
Hüsn-i zannım Hâlık’ıma pek çokdur

Erişdi gönlüme feyz-i sübhânî
‘Aks etdi dimâğa bûy-i rahmânî
Kur`ân ise bize Hakk’ın burhânı
Hakk’dır mansûr eden ehl-i îmânı
Giderim cennete iki bir yokdur
Hüsn-i zannım Hâlık’ıma pek çokdur

Şerî’atle olan dînine mâlik
‘İlm ü hayâ ile tutan mesâlik
Allah ile olan olur mu hâlik
Emr-i tarîkatle giden bir sâlik
Giderim cennete iki bir yokdur
Hüsn-i zannım Hâlık’ıma pek çokdur

Muhammed Lutfî’nin yerdedir yüzü
Ümîdi Allah’dır dergâhda gözü
Hubb-i Hudâ salmış derûne sızı
Hudâ elbet sever niyâz u nâzı
Giderim cennete iki bir yokdur
Hüsn-i zannım Hâlık’ıma pek çokdur