Gel berü gel yâr isen doğru bu yol üzre dur
‘Âşık-ı dîdâr isen kendü özün ile dur

Cânı ko cânân isen iste bul ‘irfân isen
Tahta Süleymân isen hizmet ider sana mûr

Şerh idüben sadrını tâ göresin kadrini
Anda bakar ‘özrünü “hussile mâ fi’s-sudûr”

Ol yürüsün hûb-edâ Hakk’a idüp cân fedâ
İrişicek bil “izâ bu’sira mâ fi’l-kubûr”

Bin gelüp ‘aşk atına gel sen özün katına
İrgüre Hakk zâtına âhiretde bil sürûr

Âhirin endîş isen eyle safâ ‘ıyşı sen
Dünyede dervîş isen kıl bu fenâdan ‘ubûr

Eyleme Gurbî sakın nâ-halefe sen akın
İtmededir çün bakın su gibi ömrün mürûr