Rızândan taşra çıkmayam bir kadem
Hâlim sana ısmarladım Yâ Kerîm
Senden gelir cümle ‘atâ vü kerem
Hâlim sana ısmarladım Yâ Kerîm

Senden durur derd-i derûna ‘ilâc
Fazlın ile ref’ ola bu i’vicâc
Senden gayra itme bizi ihtiyâc
Hâlim sana ısmarladım Yâ Kerîm

Bir gün ola deyu lutf u keremin
Çekdik nice yıllar derd ü gamın
Dünyâ senin ‘ukbâ senin kul senin
Hâlim sana ısmarladım Yâ Kerîm

Zerre kadar senden ki ola kerem
Derdin çeken bîçârelere ne gam
Kıl ‘inâyet kıl hidâyet dem-be-dem
Hâlim sana ısmarladım Yâ Kerîm

Yaz u kış dahi eyyâm-ı rebî’
Senden alır feyzi cümle Yâ Bedî’
Ara yire koyup habîbin şefî’
Hâlim sana ısmarladım Yâ Kerîm

Bîçâre eşiğin eyleyüp penâh
Dâim ider kusûruna âh u vâh
Âhir diyüp tevekkeltü ‘alallâh
Hâlim sana ısmarladım Yâ Kerîm