Nakş-i sun’un remz eder hüsnünde rü’yet perdesi
Hâce-i hükm-i ezeldendir hakîkat perdesi
Sîreti sûretde mümkündür temâşa eylemek
Hâil olmaz ayn-ı irfâna basîret perdesi
Her neye im’ân ile baksan olur iş âşikâr
Kılmış isti’lâ cihâna hâb-i gaflet perdesi
Bu hayâl-i âlemi gözden geçirmekdir hüner
Nice kâra gözleri mahv etti sûret perdesi
Şem’-i aşka yandırıp tasvîr-i cismindir geçen
Âdemi âmed-şüd etmekde azîmet perdesi
Hangi zılla ilticâ etsen fenâ bulmaz aceb
Oynatan üstâdı gör kurmuş muhabbet perdesi
Dergeh-i Âl-i Abâ’da müstakîm ol Kemterî
Gösterir vahdet elin kalktıkça kesret perdesi