Bize feth eyle ebvâb-ı cinânı
Geçür kayd-ı sivâdan cism ü cânı

Tecellî-i cemâlini kıl ihsân
Müyesser it hayât-ı câvidânı

Münezzeh oldu şânın şeş cihetden
Nite bula cihet ehli o şânı

Şühûd-ı zât-ı zâtındır çü maksûd
Nider sensiz bu dil cân u cihânı

‘Atâ it nûr-ı zâtın vahdetini
Ara yirden gider în ile ânı

Nükûş-ı gayrıyı hakkeyle dilden
‘Ayân ola ana nakş-ı nihânî

Eğer ma’nâ-yı âdemden sorarsan
Beyân olmaz Fenâyî ol me’ânî