Hakk dostu cihân halkına rahmetsin efendim
Sultân-ı rusül lâyık-ı midhatsin efendim

Görmek dileriz mâh yüzünü düşde beher ân
Yok sana ‘adîl sâhib-i behcetsin efendim

İt gönlümüzü vaslın ile tesliye şâhâ
Zî-hüsn ü behâ kân-ı melâhatsin efendim

Biz ümmet-i müştâklarınız merhamet eyle
Çün kenz-i vefâ râhim-i ümmetsin efendim

Ol rûz-i kıyâmetde şefî’ salma cahîme
Gümrâhlara hoş ehl-i şefâ’atsin efendim

Yaratdı senin ‘aşkına Hakk kevn ü mekânı
Mahbûb-ı Hudâ nâil-i rıf’atsin efendim

Ol sevdi seni sen dahi oldun ana ‘âşık
Hâsıl bu ki sen şâh-ı muhabbetsin efendim

Kuddûsî’yi kıl seyr-i cemâlinle müşerref
Sen şems-i duhâ bahr-ı mürüvvetsin efendim