Nice bir bu elem-i firkat-i dildâr nice bir
Nice bir bu keder-i ülfet-i ağyâr nice bir

Bize olur mı müyesser ‘aceb ol şâha visâl
Nice bir bu kesel ü gaflet ü evzâr nice bir

Kaçalım halk-ı zemândan gidelim Hakk’a hemîn
Nice bir bu fukarâya buğz u inkâr nice bir

Kâdiriyyü’l-vakt olalım gidelim yolumuza
Nice bir bu hubb-ı dünyâ cem’-i dînâr nice bir

Geliyor mâh-ı Muharrem kabarır nefs-i Yezîd
Nice bir bu it gibi hırıltı her bâr nice bir

Yanına varanı kapar şol kudurmış kelb gibi
Nice bir bu sitem ü cevr-i sitem-kâr nice bir

Ki bu aylar gelicek ta’na cesâret ider ol
Nice bir bu gadab u hışmet ü evzâr nice bir

Eylemez gayra şikâyet Tanrı’sın ‘ârif olan
Nice bir bu nâsa şekvâ hâli iş’âr nice bir

İdelim şevk ile zikri çalalım tabl u kudüm
Nice bir bu hazer ü havf u riyâ ‘âr nice bir

Yolumuz Hazret-i Geylânî yolu çünki bizim
Nice bir bu bize hor bakdılar anlar nice bir

Biz anın eşiğinin bendesiyiz ez-dil ü cân
Nice bir bu bende-i nefs-ile bâzâr nice bir

Nice bir fâsıkı sâlih sanuban sevdiğimiz
Nice bir bu ‘amel-i bâtılı ızmâr nice bir

Yeridir ehl-i nifâkın derk-i esfel didi Hakk
Nice bir bu şerri ızmâr hayrı izhâr nice bir

O münâfık bizi aldadığını Tanrı bilir
Nice bir bu garaz-ı fâsidi iksâr nice bir

Virdi Kuddûsî’ye nefret mâsivâ endîşesi
Nice bir bu mâsivâya meyle ısrâr nice bir