Ben bugün elhamdülillah mâsivâdan geçmişem
Derd-i ‘aşka nâil oluban devâdan geçmişem

İki deryânın suyun içirdiler düşde bana
Mürşid olup ‘aşk bana ‘ucb u riyâdan geçmişem

Cümlesini eyledim nûş kalmadı bir katre hîç
Bu ecilden halk ile bey’ ü şirâdan geçmişem

Biri deryânın mecazî ‘aşk hakîkatdir biri
Hakk hidâyet eyleyüp sâir hevâdan geçmişem

Çok sitem çekdim mecazî ‘aşk yüzünden bî-şümâr
Tâib olup şimdi Dost’dan mâ’adâdan geçmişem

Virme sıklet bana zâhid yok senin ile işim
Dahi cümle akrabâ vü âşinâdan geçmişem

İstemem iki cihânın hûbların şimden gerü
Hakk’a ‘âşık oluban ‘aşk-ı nisâdan geçmişem

Dir bu Kuddûsî vefâ yokdur Hudâ’dan gayrıda
Yâr-i vâfî bulmuşam men bî-vefâdan geçmişem