‘Aşkda kânûn imiş ‘âşıklara cevr eylemek
‘Âşık oldur kim cefâ-yı yâre sabr itmek gerek

‘Aşk nâz ü şîve evvel gösterir ‘âşıklara
‘Âşık ol demde ana cânı fedâ itmek gerek

‘Âşıkın ancak murâdı dostunun maksûdudur
Çekse de bin derd ü mihnet hep sebât itmek gerek

Arzû-yi dü-cihândan geçmedir ‘aşka nişân
Terk-i cân edüp reh-i cânâna ‘azm itmek gerek

Âftâb-âsâ bilüp her zerresin nûr-ı safâ
Her belâ dostdan gelir kim merhabâ itmek gerek

Havf-ı a’dâ eylemez olan müsellah ‘aşk ile
Yanmadan Hakk’a irilmez pertev-i tevhîd gerek

Nefs ile cehd it tecellî eylesin ‘aşk-ı Hudâ
Beyt-i kalbi Âdile ma’mûr ü pâk itmek gerek