Dila geç gayriden ol dilber-i ra’nâdan ayrılma
Nidersin özge sevdayı ki bu sevdadan ayrılma
****
Ne buldun mâsivâdan bunca demdür ülfet eylersin
Sözüm dinle hemân ol sâhib-i îfâdan ayrılma
****
Katî gayretlidür sevmez şerîki bakma ağyara
Letâfetde hüsünde ferd-i bî-hemtâdan ayrılma
****
‘Ulüvv-i himmet îmândan özine it yüce himmet
Tenezzül itme ednâya sen ol a’lâdan ayrılma
****
O bir mahbûb-ı zîbâ kim nazîri yok güzellikde
Sözi ahlâ özi bâlâ yüzi zîbâdan ayrılma
****
Kişi maksûdına vâsıl olur sıdk-ıla cehd itse
Çalışub sen de ir ol maksad-ı aksâdan ayrılma
****
Bir ednâ ‘âşıkıdur ol şehen-şâhın bu Kuddûsî
Hemân ey dil o şâh-ı ‘âlem-i yektadan ayrılma

Ahmed Kuddusi