Gönül ‘aşkın ile hayrân olupdur yâ Resûlallah
Cemâlin ârzûsunda kalupdur yâ Resûlallah

Cemâlin bir kamerdir ‘aks-i nûr-ı şems-i vahdetden
Ser-â-ser bedr olup devri dolupdur yâ Resûlallah

Eğer mâh-ı münîr-i mihr-i ‘âlemgîr-i ‘âlîdir
Kamusu nûru nûrundan alupdur yâ Resûlallah

Senin dürr-i vâlâna destres bulmak içün âhir
Nice bahr-i belâya dil dalupdur yâ Resûlallah

Gerekmez seyr-i kesret bir dahi Hakkıyâ ‘âlemde
Ki sırr-ı vahdeti sende bulupdur yâ Resûlallah