İbnü’l-vakt olan tecelî-zâdedir
Anın içün fâriğ ü âzâdedir

‘Abd-i hâlisdir tasarruf istemez
Hâlık’a teslîm olup rızâdadır

Fânîye meyl eyleyüp kılmaz nazar
Rûz u şeb meyli anın ‘ukbâdadır

Öyle dalmışdır ‘ulûm-i vahdete
Sanmanız siz kim anı dünyâdadır

Mest ü lâ-ya’kıl iden anı müdâm
Tâ ezelden içdiği ol bâdedir

‘Aşk ile idüp cihândan ‘uzleti
Dost ile ülfetleri tenhâdadır

Gerçi bundadır vücûdu zâhiren
Bâtınen ol ‘âlem-i ‘amâdadır

Bedriyâ bu sırrı anlar fehm ider
Her kimin ki menzili a’lâdadır