Ol Hudâ’nın kullarına ulu ihsânı namaz
Menzil-i a’lâya çün ref’ eyler insânı namaz

Var ‘ibâdâtın beğim çok gerçi envâ’ı velî
Anların pes cümlesinin şems-i tâbânı namaz

Anda cem’ etdi nice a’mâli Cebbâr u Celîl
Bil muhakkak kim kamunun oldu sultânı namaz

Hakk buyurdı “iste’înû” sabr ile salât ile
Çâresiz derdlilerin bir özge dermânı namaz

Dedi Şâh-ı Enbiyâ dînin ‘imâdıdır ana
Şübhesiz eyler ikâmet dîn ü îmânı namaz

Şer’-i Ahmed hısn-ı a’zamdur giren bulur necât
Bil ki ol hısnın esâsı dahi haytânı namaz

Pes huşû’ ile anı ta’dîl-i erkân ederek
Kılar isen men’ eder fahşâ vü destânı namaz

Eyle Kuddûsî namaza gece gündüz sen devâm
Artırır iklîm-i dilde nûr-ı ‘irfânı namaz