Ummet-i merhumeye çün bir emân geldi Üveys
Nâr-ı dûzahdan ‘usâtı kurtarub aldı Üveys
****
Çün vasiyyet itdi ana hırkasın fahr-ı rüsül
Bu za’îf ümmetlere gör ne kerem kıldı Üveys
****
Hazret-i ‘Ömer ‘Alî dahi birez ashâb-ıla
Hırkayı alub varınca şevk-ıla toldı Üveys
****
Vardı bir tenhâ yire itdi du’â Mevlâsına
Bir iki sâ’at münâcât bahrine taldı Üveys
****
Didi ‘afv it ümmeti heb yohsa geymem hırkayı
Nâz ile re’s-i şerifin secdeye saldı Üveys
****
Îrdi hâtifden nida üçde birin afv eyledim
Üç sülüsden birisinin defterin sildi Üveys
****
Secdeye varub yine didi ki ‘afv it cümlesin
Yüzini toprağa sürüb saçını yoldı Üveys
****
Yine irdi bir nida ‘afv eyledim bir sülüsin
Üç sülüsden ikisinin çâresin buldı Üveys
****
Yine varmak diledi pes secdeye lâkin
‘Ömer didi kande gitdi varub göreyim noldı Üveys
****
Ya karındaşım ‘Ömer pes gelmese idiñ deyüb
Kaldığına bir sülüs ümmet hazîn oldı Üveys
****
Sordı ashaba bilür misiz Resûlin hilyesin
Âh idüben şerha şerha yüreğin deldi Üveys
****
Ba’zısı vasf itdi cüz’î bildiği mikdârı pes
Bilmemişsiz didi anı gör nice bildi Üveys
****
Başı göklerden yüce yirlerden ingin ayağı
Böyle bilürin deyüben sararub soldı Üveys
****
Didi anlara sever misiz Resûlullahı siz
Didiler kim biz severiz ol zemân güldi Üveys
****
Sevmeye var mı ‘alâmet didi itdiler sükût
Ağzını açub didi dişsiz niçün kaldı Üveys
****
On sekiz biñ ‘âlemin fahri Muhammed hubbına
Otuz iki dişini çekdi yire çaldı Üveys
****
Eyle Kuddûsî hediyye rûhına sen Fatiha
Bizim içün gussa yiyüb bağrını deldi Üveys

Ahmed Kuddusi