Muhabbet bezm-i uşşâka beğim merdâne gelmekdir
Verip cân tîg-i müjgâna gözüm kurbâna gelmekdir

Girip meyhâne-i dilden içip vahdet şarâbını
Esîr-i aşk olup yâ hû hemân mestâne gelmekdir

Başını ur belâ taşlarına yâ hû sular-âsâ
Karıştırmak için bu katreni ummâna gelmekdir

Bu çevgân-ı mahabbetde başını top edip şöyle
Amân cânım deme kardaş boyan al kana gelmekdir

Bu varlık kisvesinden çık fenâfillah olup sen de
Dolaşıp şem‘-i dildâra yanıp pervâne gelmektir

Erişdir cânını Hakk’a bu bâzâr-ı mahabbetde
Soyunup hırka-i ârı bu dem üryâna gelmekdir

Eğer sen de diler isen bu sırrın aslına ermek
Tutup bu Şevkî’nin destin Pîr-i Şabân’a gelmekdir