Sen mekânı pertev-i nûr-i Hudâ’sın ey gönül
Sen temâşâ-yı ruh-i cânâne cânsın ey gönül

Mü’min’in kalbidir Allah’ın evi bilmez misin
Kâ’be vü zemzem dahi Merve Safâ’sın ey gönül

Sensin ol gencine-i sultân içün mahzen olan
Anın-çün ğayrıdan fakr u fenâsın ey gönül

Sen tecelli-i Tûr’sun envâr –ı Hakk’ı görmeğe
Şübhesiz âyîne-i gîtî-nümâsın ey gönül

Sen muhabbet-kânısın uşşâka aşk senden gelür
Ma’den ü kân-ı kerem cûd ü sehâsın ey gönül

Bâb-ı vuslatsın visâl-i yâri senden buldular
Ehl-i derdin derdine ayn-i devâsın ey gönül

Al elin Seyyid Nizamoğlu’n ulaşdır aslına
Küntü kenz’in âlemine âşinâsın ey gönül