Nokta-i aslını fehm eyle süveydâdan geç
Zikr-i tevhîde çalış hakkâ teberrâdan geç

Yek-vücûd olduğunu anla ‘avâlimle hemîn
Vahdet-i sırfa iriş kesret-i esmâdan geç

Kîn kibr buğz u tama’dan özünü pâk eyle
Fakr ile fahr iderek atlas u dibâdan geç

Âdemin ziyneti mâl ile değil ‘ilm iledir
Cem’-i mâl itmek için nâs ile gavgâdan geç

Nîk u bed masdarıdır ‘unsur-ı terkîb-i vücûd
Mazhar-ı zât olagör esfel u a’lâdan geç

Terk idüp varlığı mahv idegör benliğini
Bezm-i ‘irfânda kemâlât ile da’vâdan geç

Özüne Hilmi Dede kendi sözünle nush it
Vâ’izin virdiği efsane-i hülyâdan geç