Âkil isen eyleme ma’mûr bu vîrâneyi
Nidesin çün kim harâb-âbâddır bu hâneyi

Gel Hümâ-veş evc-i ma’nâde vatan tut ey gönül
Taşra eyle hâtırından fikr-i âb u dâneyi

Tâ serinden çıkmaya işbu hevâ pîrâheni
Cân te’ânuk eylemek mümkin midir cânâneyi

Yuf bu mey-hânenin ser-hoşlarına yuf yuf
Bir görürler hâlet-i mahmûr ile mestâneyi

Nâr-ı ‘aşk içre yanar dil kimse bilmez hâlini
Şem’-i rûşen-vâr kim ihrâk ider pervâneyi

Hakkıyâ kaldın Dımaşku’ş-Şâm’da bahr-i dile
Virme nâdâna velâkin aldığın dürdâneyi