Nice meyl eyleyelim ‘âleme sersemcesine
Mâsivâdan geçelim zâde-i Edhem’cesine

Kâl u kıyl etmeyelim çûn ü çerâdan geçelim
Vâkıf-ı hâl olalım lâl olup ebkemcesine

Ka’be-i vasla revân olmağa sa’y eyleyelim
Gözümüz eşk ile dolsun çeh-i Zemzem’cesine

Kahrına lutfu gibi ‘âşık-ı tâlib olalım
Zahm-ı tîrin saralım sîneye merhemcesine

Hâline el sunalım cennet-i ruhsârında
Bir günâh işleyelim biz dahi Âdem’cesine

İdelim bir nice dil-mürdeyi Remzî ihyâ
Nutk-ı cân-bahş ile gel Îsâ-yı Meryem’cesine