Halâs ol mâsivâdan sâlikâ var
Şeb u rûz ağla dâim Hakk’a yalvar
Hudâ’yı iste Hakk’dan ol haberdâr
Şeb u rûz ağla dâim Hakk’a yalvar

Anın feyzinde yokdur zerre imsâk
Velâkin olmamışdır cân u dil pâk
Yüzün sür yerlere var olagör hâk
Şeb u rûz ağla dâim Hakk’a yalvar

Niyâz erbâbının bahtı açıkdır
Niyâz erbâbı gibi kimse yokdur
Hudâ’nın feyz u fadl u lutfu çokdur
Şeb u rûz ağla dâim Hakk’a yalvar

Şuhûd-ı Hakk’a ir sır anla Hakk’dan
Yürü ders alagör her bir varakdan
Göçersin ‘âkıbet birgün konakdan
Şeb u rûz ağla dâim Hakk’a yalvar

Nice bir Hakkı bî-pervâ gezersin
Ne bildin kendini sen ne sezersin
Nice bir nefes ile hîle düzersin
Şeb u rûz ağla dâim Hakk’a yalvar